புலிகேசி மாமன்னர் நீடூழி வாழ்க..

இப்பொழுதுதான் புலிகேசி பார்த்துவிட்டு வந்தேன். வந்து நாட்களாகிவிட்டாலும் சினிசிட்டியின் இரண்டு திரையரங்குகள் நிரம்பிவழிய ஓடுகிறது.


புலிகேசியின் பாடல்கள் வெளியான காலம் தொட்டே, இதை வெகு ஆவலாக எதிர்பார்த்து காத்திருந்தேன்.
இப்படி ஒரு படத்தை எடுக்கும் சவாலை எப்படி சமாளித்தார்கள் என்று பார்க்கும் ஆசை.


அத்தோடு படத்தில் சீரியசாக ஏதாவது சொல்ல முனைவார்களா என்ற நப்பாசை. (சூதாட்ட வடிவமான சினிமா தொழிற்துறைமீதான, அதே சூதாட்ட வடிவ எதிர்பார்ப்பு)

பூட்டிய கதவினை உடைப்போம் பாடலை படமாக்கிய விதம் தந்த ஏமாற்றத்திலும் பார்க்க படத்தின் முடிவு பெரிய ஏமாற்றமாகிப்போனது.

ஏகாதிபத்திய, உலகமயமாக்கல் எதிர்ப்புக்கு தமிழ் நாட்டில் நல்ல சந்தை உள்ளதென்பதை இந்த படத்தயாரிப்பாளர்கள் கண்டு பிடித்ததற்கு பின்னாலுள்ள வரலாற்றுக்காரணி, புறக்காரணி, தாரணி, பூரணி சூ மந்திரகாளி என்ன என்றுதான் புரிந்துகொள்ள முடியாமலிருக்கிறது.

இந்த உள்ளடக்கத்தைக்கொண்ட படங்கள் வெளிவர ஆரம்பித்திருப்பதன் பின்னணியை தமிழ் நாட்டில் வாழும் யாராவது விளக்குவீர்கள?

கம்யூனிசத்திலிருந்து அரைகுறையாக கருத்துக்களை பிடுங்கி பேசி பணம் பண்ணும் படங்கள் நிறைய வந்தாகிவிட்டது. ஈழத்தமிழர் ஆதரவு, புலி ஆதரவு, மட்டுப்படுத்தப்பட்ட தீவிரவாத ஆதரவு என்ற விலைபோகக்கூடிய சரக்குகள் ஏற்கனவே சந்தைக்கு வந்தாகிவிட்டது.


பல்தேசிய கம்பனிகளின், ஏகாதிபத்தியத்தின் ஆதிக்கம்பற்றி திரையரங்குக்கு வந்து சிந்திக்கும் கூட்டம் நாட்டில் பெருகிவிட்டதா?

எனக்கென்னவோ இது உலகமயமாக்கலினால் தமது இருப்புக்கு ஆப்பு வந்துவிட்டதென உணரத்தொடங்கிவிட்ட ஆண்டபரம்பரையின் எச்சசொச்சங்கள் கூட்டம் நாட்டில் பெருகிவிட்டதற்கான அறிகுறி என்றே எண்ணத்தோன்றுகிறது.

தாம் அனுமதித்த ஒட்டகம் தனது கட்டிலிலேயே புரளத்தொடங்கிவிட்டதைக்கண்டு மிரண்டுபோன பிராமணீயம், அதிகாரவர்க்கம் இப்போது ஏகாதிபத்திய எதிர்ப்பை உளரத் தொடங்கிவிட்டதா?

புலிகேசியை அரசியல் ரீதியாக விமர்சிப்பதானால், இந்தப்படத்தில் புதிதாக எதுவுமில்லை. வழக்கமான அரசியல் நையாண்டிப்படங்களின் அதே உள்ளடக்கம் வித்தியாசமான வடிவத்தில் வழங்கப்பட்டிருக்கிறது.

இந்தப்படத்தின் முற்போக்கு கூறுகளாக உணரப்படுபவை உண்மையில் படு பிற்போக்குத்தனத்தின் நுண்ணிய வடிவங்கள்தான்.

கோகா கோலாவினையும் பெப்சியினையும் வெறும் உள்நாட்டு உற்பத்தி வில்படாமல் போகிறதே என்பதற்காகவா எதிர்க்கிறோம்?

இந்த பானங்கள் மீதான, கிரிக்கட் மீதான விமர்சனங்கள், வெகுமக்கள் மத்தியில் பிரபலமடைந்த விஷயங்களை விமர்சிப்பதன்வாயிலாக அந்த வெகுமக்களை கிளர்வடையச்செய்வதற்கான உத்திதானே அன்றி வேறில்லை.

இந்தப்படத்தின் அந்தப்புரப்பெண்களை கிளர்வூட்டும் கருவிகளாக படமாக்கியது எந்த மனநிலையோ, அதே மனநிலையே அமெரிக்க பானங்களை, கிரிக்கட்டை விமர்சிபப்தும். எந்த வித்தியாசமும் இல்லை.


படத்தை ஷங்கர் தயாரித்ததாலோ என்னவோ, அதே ஷங்கர் பாணி சலித்துப்போன சீர்திருத்தக்கருத்துக்களை தான் படம் முழுக்க சப்புகிறார்கள்.
அடிக்கடி முகத்தில் துப்புகிறார்கள்.

கடைசியாக உன்னத புனித புலிகேசி மாமன்னர் உதிர்த்த பத்து கட்டளைகளும் படத்தில் கொஞ்சநஞ்சமேனும் இருக்கலாம் என எதிர்பார்த்த கனதியை காற்றில் பறக்கவிட்டுவிட்டது.

அரச வம்சத்தில் பிறந்த உத்தமபுத்திரன் ச்சீ உக்கிர புத்தன் மகக்ள் புரட்சிப்படையை கட்டி தலைவனாகிறான். கடைசியாக இந்த புரட்சிப்படை அதே மன்னர் பரம்பரையை அரியணை ஏற்றுவதற்கு உபயோகிக்கப்பட்ட்ட வெறும் துணைப்படைதான் என தெரியவருகிறது.

நேபாள விஷயத்தில் இந்தியாவின் கபடத்தனத்துக்கும் இதற்கும் எந்த வித்தியாசமும் இல்லை.

சமகால நிகழ்வுகள் இந்த காட்சிகளை நேபாளத்தோடு பொருத்திப்பார்க்க மக்களை உந்தும் என்று தெரிந்து நாசூக்காக தமது கருத்து கயமையை புகுத்தியிருக்கிறார்கள்.

மன்னர் பரம்பரையைச்சேர்ந்த படித்த இளைஞன் ஒருவன் மக்கள் படையை கட்டுவதற்காக அழகாக குதிரையேறி ஹீரோ வலம் வருவதுதான் மக்கள் புரட்சி.

பரவாயில்லை உழைக்கும் மக்களை ஒரு சில பிரேம் களில் காட்டினார்கள். இந்த பதிவில் திருடிப் போட அந்த படங்களை கூகிளில் தேடிச்சலித்தேன். அந்த மக்களின் படங்கள் அகப்படவே இல்லை.

அதிகம் அகப்பட்டது வடிவேலின் மீசையும் நடிகைகளின் வயிறுகளும்தான்.

இந்த கூகிள் தேடல் முடிவே இந்தப்படம் என்ன செய்தியை மக்களிடையே விதைக்கப்போகிறது என்பதற்கு நல்ல நிரூபணம்.

படத்தின் கதை நேபாளத்தை வேறு ஞாபகப்படுத்திவிட்டதால், கடைசில் மனந்திருந்திய மன்னர் பரம்பரைக்கே முடிசூட்டி ஆண்டபரம்பரைக்கு சனாதன அதிகாரத்தை வழங்கியதும், தளபதி தளபதியின் இடத்தில் தான் இருக்கவேண்டும், மக்கள் மக்களின் இடத்தில் தான் இருக்கவேண்டும், வைத்தியன் வைத்தியன் இடத்தில் தான் இருக்கவேண்டும் என்ற உள்ளூர் சனாதனிகளின் எதிர்பார்ப்பினை எந்த வகையிலும் புண்படுத்தாமல் படத்தை முடித்து விடைபெற்றதும் கெட்ட எரிச்சலை வரவழைத்தது.

ஒரு சாதாரண வடிவேலு நகைச்சுவைப்படத்தை இப்படி எல்லாம் விமர்சிக்க வேண்டுமா?

விமர்சிக்கத்தான் வேண்டும்.
இது ஒரு சாதாரண வடிவேலு நகைச்சுவைப்படம் என்பதால் தான் விமர்சிக்க வேண்டும்.

இது முற்போக்கான படமாக, அறிவுபூர்வமான படமாக நம் சனத்தால் உள்வாங்கப்பட்டுவிடக்கூடாது.
கலைப்படங்கள் நஞ்சை விதைப்பது அவ்வளவு பயங்கரம் இல்லை. இப்படியான ஜனரஞ்சகப்படங்கள் நஞ்சைவிதைப்பதுதான் படு பயங்கரம்..

படத்தில் முற்போக்கு கருத்துகளே இல்லையா என்று தோன்றலாம்.

இருக்கு.

அவை அரைகுறையாக விளங்கிக்கொள்ளப்பட்டு அரைகுறையாக, சுயநலத்தோடு வழங்கப்படுவதால், பிற்போக்கு சோற்றினில் முற்போக்கு கறிவைத்து வழங்கப்படுவதால் அவற்றால் எந்த பிரயோசனமும் இல்லை.

சீரிய கருத்துக்களை மலினப்படுத்துவதுதான் மிச்சம்.

இது நையாண்டி அடித்து மலினப்படுத்தும் திட்டம்.

ஐயா புலமைப்பித்தன் அந்த பாடலை என்ன எதிர்பார்ப்பில் எழுதினாரோ, பாவம்.