சொல்திருத்தி மென்பொருள் தமிழுக்குச் சாத்தியமா?

சில காலங்களுக்கு முன்னர் aspell எனும் திறந்த மூலச் சொல்திருத்தி மென்பொருளினை தமிழுக்கு பயன்படுத்தும் நோக்குடன் ஏதோவொரு மடலாடற்குழுவில் உரையாடல் நிகழ்ந்தது.

இம்மென்பொருளுக்கான சொற்பட்டியல்களை ஆக்கும் பணிகளும் மும்முரமாக நடந்தது.

தற்போது புதிதாக வரும் க்னூ/லினக்ஸ் வழங்கல்கள் தமிழுக்கான சொல்திருத்தியாக aspell இன் தமிழ்ப்படுத்தப்பட்ட பதிப்பையே பயன்படுத்துகின்றன.

எனக்கென்னவோ இப்படியான சொல்திருத்திகளை தமிழ்ப்படுத்த எடுக்கப்படும் முயற்சிகள் வெட்டிவேலையாகவே படுகிறது.

நானும்சரி, எனக்கு தெரிந்த நண்பர்களும் சரி இத்தகைய தமிழ் சொல்திருத்தி மென்பொருட்களை பிரயோசனப்படுத்தியதாக நினைவில்லை.
மாறாக, தேவையற்ற தொல்லை என்று சொல்திருத்தியை முடக்கி வைத்துவிட்டே தமிழில் எழுதுகிறோம்.

தமிழுக்குச் சொல்திருத்தியே தேவையில்லை என்ற ஒரு வாதமும் இருக்கிறது.
எந்தச் சொல்லை எழுத்துப்பிழை என்பது? எந்த எழுத்துப்பிழையை தவறென்பது?

எந்த எழுத்துப்பிழைக்கு தமிழில் வேறு அர்த்தங்கள் கிடைக்காது?

ஆங்கிலத்தில் ஒரு கவிதை இருக்கிறது,

Eye halve a spelling chequer,
It came with my pea sea,
It plainly marques four my revue
Miss steaks eye kin knot sea.

Eye strike a key and type a word
And weight four it two say
Weather eye am wrong oar write
It shows me strait a weigh.

As soon as a mist ache is maid
It nose bee fore two long
And eye can put the error rite
Its rarely ever wrong.

Eye have run this poem threw it
I'm shore your pleased two no
Its letter perfect in its weigh,
My chequer tolled me sew.

இந்த கவிதையின் சொற்களை எந்தச் சொல்திருத்தியும் அடிக்கோடிட்டு தவறென்று காட்டாது.

ஆங்கிலத்திலேயே சொல்திருத்தி இவ்வளவு குறைபாடுடையதானால் தமிழில்?


தமிழில் சொல்திருத்திகள் இப்படி பயனெதுவுமற்று தேங்கிப்போய்க்கிடப்பதற்கான அடிப்படைக்காரணமாக நான் காண்பது, ஆங்கில நிலைச் சிந்தனை தான்.

நாங்கள் பழக்கப்படுத்தப்பட்டுள்ள ஆங்கிலச்சட்டகங்களுக்குள் நின்று கொண்டு நாம் எமது மொழிக்கான தொழிநுட்பக்கருவி ஒன்றினை யோசிக்கும் போது ஏற்படுகின்ற தவறே இது.

ஆங்கிலம் எழுத்துக்கூட்டல் குழப்பங்கள் நிறைந்த மொழி.
எழுத்துப்பிழைகள் நிழ்வதற்கான சாத்தியங்கள் கூடிய மொழி. அத்தோடு எழுத்துக்கூட்டல்களை நினைவில் வைத்துக்கொள்ள வேண்டிய தேவையும் கொண்ட மொழி.

ஆங்கிலத்தின் இந்த போதாமையிலிருந்தே சொல்திருத்திகளுக்கான தேவை எழுந்திருக்கவேண்டும்.

இன்று சிற்சில முன்னேற்றங்கள் கண்டிருந்தாலும், ஆங்கில சொல்திருத்திகளின் அடிப்படைச் செயற்பாடு பெரும் சொற்தொகுதி ஒன்றுடன் நீங்கள் தட்டெழுதிய சொல்லை ஒப்பிடுதலே.

மிக மட்டுப்பாடான சொற்களஞ்சியத்தைக்கொண்ட ஆங்கிலம் போன்ற மொழி ஒன்றுக்கு இந்த அணுகுமுறை பயன்மிக்கதுதான்.
ஆனால் தமிழுக்கு?

அன்னம் எழுதப்போய் அண்ணம் என்று தவறிழைத்தால் , அதைச் சொல்திருத்தி பிழை என்று சொல்லுமா?

பெரும் சொற்தொகுதி ஒன்றுடன் ஒப்பிட்டுப்பார்த்து எழுத்துப்பிழை திருத்துதல் தமிழுக்கு எப்படி பயன்தரும்?

எனவே இந்த "ஆங்கில மாதிரி" சொல்திருத்திகள் எமக்கு எந்த வகையிலும் உதவப்போவதில்லை.

ஆங்கிலேயர்கள் தமக்கென உருவாக்கி வைத்திருக்கும் சொல்திருத்திக்கான சொற்களஞ்சியம்போன்ற ஒன்றை உருவாக்க முனைவது வீண்வேலை. அதனால் எந்த பயனுமில்லை. தயவு செய்து எவரும் அப்படியான ஒரு வேலையில் காலத்தை வீணடிக்க வேண்டாம்.

அப்படியானால் தமிழுக்கான சொல்திருத்திகள் எப்படி அமையவேண்டும்?

தற்போது அங்கிலத்தில் பேசுபொருள் சார்ந்த சொல்திருத்திகள் பற்றிய உரையாடல் ஆரம்பித்திருக்கிறது. அதாவது ஒரு வாக்கியம் என்ன பொருளை சொல்ல வருகிறதோ அதன் அடிப்படையில் எழுத்துக்கூட்டலை சரிபார்ப்பது.

மேலே உள்ள கவிதையின் எழுத்துக்கூட்டலைச் சரிபார்ப்பது இந்த வகையிலேயே அடங்கும்.

ஆனால் இதை அடைவதற்கு இன்னமும் நிறைய காலம் நாம் காத்திருக்க வேண்டியிருக்கும்.

அத்தோடு "மின்னற்பூ" என்று எவராவது கவிதை எழுதினால் அதை பிழை என்று சொல்லும் இந்த பொருள்சார் சொல்திருத்தி. ;-)

இன்னொரு வழி இருக்கிறது. அதுதான் இலக்கணத்தை திருத்துவது.

முன்பொருமுறை பேச்சொன்றின் போது முத்து நெடுமாறன் இதுபற்றி குறிப்பிட்டார். தமிழுக்கு தேவையானது இலக்கணத்திருத்தியேயன்றி சொல்திருத்தி அல்ல என்று

சில இலக்கண வரம்புகளோடுதான் தமிழிற் சொற்கள் அமைய முடியும்.

மெய் எழுத்தில் சொல் தொடங்காது. மெய்யெழுத்தில் சொல் முடியாது போன்ற சில இலக்கண வரம்புகள்.

இது ஓரளவு நல்ல அணுகுமுறைதான் என்றாலும் ஏராளம் குழப்பங்கள் உண்டு.

முடிஞ்ச் போச்! ப்ளீஸ்! போன்ற தமிழகச் சஞ்சிகத்தமிழை இச்சொல்திருத்தி எப்படி திருத்தும்?

ஆனாலும் இந்த இலக்கணத்திருத்தி என்ற எண்ணக்கரு கவனிக்கப்பட வேண்டியது. ஏனென்று பிறகு சொல்கிறேன்.


அப்படியானால் எமக்கான சொல்திருத்தி ஒன்றை எப்படி உருவாக்குவது?

இதற்கு ஒரே வழிதான் உண்டு .
எமது சிந்தனைமுறை மாற்றங்காணவேண்டும்.

நானூறு ஆண்டு அடிமைத்தனமோ என்னவோ, நாங்கள் எதற்கெடுத்தாலும் மேற்கின் சட்டகங்களூடாகதான் சிந்தித்துவருகிறோம்.

இந்த சிந்தனை முறையில் மாற்றம் ஏற்படும்போது எமக்கான எல்லாம் எமக்கு பொருத்தமானவையாகவே வந்தமையும்.

ஆங்கிலத்துக்கான சொல்திருத்தியின் அடிப்படை, பயன்பாடு வேறு. அதனை வைத்து நாம் எதுவுமே செய்ய முடியாது. அதை விட்டுத்தள்ளுவோம்.

எமக்கு தேவை அடிப்படையிலிருந்தே தலைகீழான, எமது மொழிக்கான சொல்திருத்தி.

அந்த வகையில் இந்த "இலக்கணத்திருத்தி" என்ற எண்ணக்கரு கவனிக்கப்படவேண்டியது.

சரியானவற்றை பட்டியலிட்டு ஒப்பிட்டுப்பார்ப்பது எமது மொழிக்கு சாத்தியமில்லை. இது தவறு என்று கண்டுபிடிப்பது சாத்தியம் . அதனையே இந்த இலக்கணத்திருத்தி செய்கிறது. இந்த இலக்கணத்திருத்தியை ஆங்கிலத்தின் grammer check உடன் போட்டு குழப்ப வேண்டியதில்லை. அது வேறு.

ஆனால் இந்த இலக்கணத்திருத்திக்கான நிரல் வரைமுறைகளை எழுத, நிரலாக்கம் செய்ய காலமெடுக்கும்.
பெருமெடுப்பில் செய்யப்படவேண்டியது.

அதற்குமுன் மிக எளிமையான பயனுள்ள சொல்திருத்தி ஒன்றினை நாமே வீட்டில் தயாரித்துவிடமுடியும் ;-)

தேவையானது கொஞ்சம் நிரலாக்க அறிவு. அவ்வளவுதான்.

firefox 2.0 இல் எழுத்துப்பிழை திருத்தி வந்ததும் ஏற்பட்ட கடும் சிந்தனையின் விளைவாகவே இந்த யோசனைக்கு வந்து சேர்ந்தேன்.

தமிழுக்கு நாம் செய்யக்கூடிய திருத்தல் ஒன்று இருக்கிறது. அதுதான் பிழையான சொற்களைக் கண்டுபிடிப்பது.
தெளிவாக சொன்னால், சரியான சொற்களின் பட்டியலோடு ஒப்பிட்டுத் திருத்துவதற்கு மாறாக பிழையான சொற்களின் பட்டியலோடு ஒப்பிட்டுத் திருத்துவது.

இந்த குறிந்த இடைமாறு காலகட்டத்தில் இதனை நாம் பயன்படுத்தலாம். பின்னர் பொருள்சார் திருத்திகளுக்கு , இலக்கண திருத்திகளுக்கு என்று நாம் வளர்ச்சி அடைய வேண்டும்.

அடிக்கடி தமிழில் தவறிழைக்கப்படும் சொற்களைப் பட்டியலிடுவது.
பின்னர் உரை ஆவணத்தில் அச்சொற்களைத் தேடுவது. அவை இருந்தால் கோடிடுவது. சரியான பரிந்துரையினை வழங்குவது. இவ்வளவுதான்.

பிரச்சினை- பிரச்சனை, சித்திரிப்பு-சித்தரிப்பு போன்ற பயன்பாடுகளை திருத்த இது மிகவும் பயன்தரும்.

இந்த முறையிலமைந்த சொல்திருத்திகளின் வரவு அடுத்த தலைமுறை தமிழை சரியாக பயன்படுத்த ஒரு நல்ல வழியினை பெற்றுத்தரும்.

இவ்வாறான தவறான பயன்பாடுகளை தமிழ் புலமையாளர்கள் உருவாக்கலாம்.

ஆசிரியர்களுக்கே தமிழை சரியாக திருத்தமுடியாமலிருக்கும் இக்காலத்தில் இவ்வாறான சொல்திருத்தி ஒன்றின் வரவு நல்ல பெரிய மாற்றத்தினை உருவாக்கும்.